नाडा अटो शो २०२३ विशेष: ‘नाडा अटो शो २०२३’ का आकर्षण

अभियान संवाददाता

मेलामा दर्जनभन्दा बढी नयाँ कार तथा मोटरसाइकल सार्वजनिक हुने नाडाले बताएको छ । मेलामा हुन्डाई, सुजुकी, टाटा, बिवाइडी, एमजी लगायत ब्रान्डहरूका नयाँ गाडी सार्वजनिक गरिएका छन् ।

काठमाडौं। नाडा अटोमोबाइल्स एशोसिएशन अफ नेपाल (नाडा)द्वारा आयोजित ‘नाडा अटो शो २०२३’ मंगलवारदेखि शुरू भएको छ । टाटा मोटर्स जेनुइन आयलद्वारा प्रायोजित मेला भदौ ३१ गतेसम्म चल्नेछ । नेपालको अटो क्षेत्रको कुम्भमेला मानिने नाडा अटो शोमा यसपटक विभिन्न ब्रान्डका नयाँ गाडी सार्वजनिक पनि भएका छन् ।

चार वर्षसम्म विभिन्न कारणले स्थगित हुँदै आएको शोमा यसपटक भने १६ ओटा ब्राण्डका चारपांग्रे, २२ ओटा ब्राण्डका दुईपांग्रे, सातओटा ब्राण्डका लाइट कमर्शियल भेहिकल, ९ ओटा वित्तीय संस्था, ३० ओटा लुब्रिकेन्ट, टायर, ब्याट्री, पार्टपुर्जा एवं ग्यारेज उपकरण कम्पनीको सहभागिता रहेको छ ।

मेलामा वर्षभर हुनेमध्ये ६० प्रतिशत व्यापार हुने नाडाले बताएको छ । ६ दिनसम्म चल्ने यस शोमा करीब २० अर्ब रुपैयाँ बराबरको कारोबार हुने अनुमान नाडाको छ । मेलामा ७५ हजार दर्शकले अवलोकन गर्ने अपेक्षा गरिएको छ । सवारीसाधन, पार्टपुर्जा, वित्तीय सेवा एवं अन्य सम्बन्धित सरोकारवाला संघसंस्थाको प्रदर्शनी यो मेलामा रहेको छ । आयोजकका अनुसार प्रदर्शनीमा ठूला तथा साना गरी १२० ओटा स्टल र ब्लक रहेका छन् ।

उक्त मेलामा दर्जनभन्दा बढी नयाँ कार तथा मोटरसाइकल सार्वजनिक हुने नाडाले बताएको छ । मेलामा हुन्डाई, सुजुकी, टाटा, बिवाइडी, एमजी लगायत ब्रान्डहरूका नयाँ गाडी सार्वजनिक गरिएका छन् । साथै सेरेस, स्काइवेलगायत नयाँ ब्रान्डका गाडीको पनि सहभागिता रहेको छ । 

प्रतिक्रिया [0]