नाडा अटो शो २०२३ विशेष: कुन ब्रान्डका कस्ता नयाँ गाडी ?

अभियान संवाददाता

टाटा टियागो इभी

टाटा गाडीको आधिकारिक विक्रेता सिप्रदी ट्रेडिङ प्रालिले टियागो इभी सार्वजनिक गरेको छ । विक्रेताका अनुसार गाडीको शुरुआती मूल्य २१ लाख ९९ हजार रुपैयाँ रहेको छ । टियागो इभीका लङ रेन्ज र मिडियम रेन्ज दुई भेरियन्ट नेपाली बजारमा ल्याइएका छन् ।

टियागो इभीको लङ रेन्ज भेरियन्टमा २४ किलोवाट आवर क्षमताको ब्याट्री रहेको छ । एकपटकको फुल चार्जमा ब्याट्रीले ३१५ किलोमिटरसम्म रेन्ज दिने कम्पनीले बताएको छ । यस्तै, मिडियम रेन्ज भेरियन्टमा १९.२ किलोवाट आवर क्षमताको ब्याट्री रहेको छ । एकपटकको फुल चार्जमा ब्याट्रीले २५० किलोमिटर रेन्ज प्रदान गर्ने कम्पनीले बताएको छ । सिप्रदीका अनुसार नेपालमा टियागो इभी टिल ब्लु, डेटोना ग्रे, ट्रपिकल मिस्ट, प्रिस्टिन ह्वाइट र मिडनाइट प्लम गरी ५ रङमा उपलब्ध छ । सिप्रदीले अटो शोमा टाटा टियागो इभीका साथै टाटा नेक्सन इभी एक्स जेट प्लस र टाटा पन्च पनि सार्वजनिक गरेको छ ।

हुन्डाई एक्सटर

नेपालका लागि हुन्डाई गाडीको आधिकारिक विक्रेता लक्ष्मी इन्टरकन्टिनेन्टलले नाडा अटो शोमा हुन्डाई एक्सटर सार्वजनिक गरेको छ । कम्पनीले नेपालमा दुईओटा भेरियन्टका हुन्डाई एक्सटर ल्याउने बताएको छ । हुन्डाई एक्सटरको नेपाली बजार मूल्य ४० लाखदेखि ४५ लाख रुपैयाँसम्म रहेको कम्पनीले बताएको छ । कम्पनीले सार्वजनिक गरेको एक्सटरको एसएक्स भेरियन्टमा ११९७ सिसी इन्जिन क्षमता रहेको छ । यस्तै सो गाडीमा ४ सिलिन्डर र ४ भल्भ रहेका छन् । ११३.८ एनएम टर्क क्षमता रहेको यस गाडीले १९.४ किलोमिटर माइलेज दिने कम्पनीले बताएको छ । गाडीमा ३७ लिटरको फ्युल ट्यांक रहेको छ ।

एमजी–फोर

नेपालका लागि एमजी मोटर्सको आधिकारिक विक्रेता कम्पनी पारामाउन्ट मोटर्सले केही दिनअघि नेपालमा सार्वजनिक गरेको एमजी–फोर पनि नाडा अटो शोको मुख्य आकर्षण रहेको छ । कम्पनीले नेपालमा एमजी–फोरका कम्फर्ट र लक्जरी भेरियन्ट सार्वजनिक गरेको छ । कम्पनीका अनुसार नेपालमा एमजी–फोरको कम्फर्ट भेरियन्टको मूल्य ४१ लाख ४९ हजार रुपैयाँ र लक्जरी भेरियन्टको मूल्य ५८ लाख ९९ हजार रुपैयाँ रहेको छ ।

कम्पनीका अनुसार कम्फर्ट भेरियन्टको ब्याट्री क्षमता ५१ किलोवाट आवर र मोटरको क्षमता ९९ किलोवाट आवरको रहेको छ । यस्तै, लक्जरी भेरियन्टको ब्याट्री क्षमता ६४ किलोवाट आवर र मोटरको क्षमता १५० किलोवाट आवर रहेको छ । एकपटकको फुल चार्जमा कम्फर्ट भेरियन्टले ३५० किलोमिटर र लक्जरी भेरियन्टले ४३५ किलोमिटर रेन्ज प्रदान गर्ने कम्पनीको दाबी रहेको छ ।

बीवाइडी डल्फिन

नेपालका लागि बीवाइडीको आधिकारिक विक्रेता साइमेक्स इंकले सोमवार सार्वजनिक गरेको बीवाइडी डल्फिन पनि मेलाको मुख्य आकर्षण रहेको छ । साइमेक्स इंकका अनुसार नेपालमा बीवाइडी डल्फिनको शुरुआती मूल्य ३९ लाख ८० हजार रुपैयाँ रहेको छ । ह्याचब्याग सेगमेन्टको विद्युतीय गाडी बीवाइडी डल्फिनको ब्याट्री क्षमता ४४.९ किलोवाट आवर र मोटरको क्षमता ७० किलोवाट रहेको छ । एकपटकको फुल चार्जमा यो गाडीले ३४० किलोमिटर रेन्ज प्रदान गर्ने कम्पनीको दाबी रहेको छ । कम्पनीका अनुसार बीवाइडी डल्फिन ४ ओटा रङमा उपलब्ध छ ।

स्कोडा स्लाभिया

नेपालका लागि स्कोडाको आधिकारिक विक्रेता एमएडब्लु एक्सपान्जे प्रालिले आइतवार सार्वजनिक गरेको नयाँ प्रिमियम सेडान स्लाभिया पनि नाडा अटो शोको मुख्य आकर्षण रहेको छ । कम्पनीले स्कोडा स्लाभिया दुई ट्रान्समिसन अप्सन र तीन भेरियन्टमा उपलब्ध हुने बताएको छ । गाडीले १९.४७ किलोमिटरको माइलेज दिनुका साथै १०.७ सेकेन्डमा १०० किलोमिटर प्रतिघन्टाको गति लिन सक्ने कम्पनीको दाबी रहेको छ । यस्तै नयाँ स्कोडा स्लाभियामा १.० लिटरको थ्री सिलिन्डर र ६ स्पिड म्यानुअल रहेका छन् । गाडीको ६ स्पिड टर्क कन्भर्टर अटोमेटिक टर्बो पेट्रोल इन्जिनले ११५ पीएस पावर र १७८ एनएम टर्क उत्पन्न गर्ने कम्पनीले बताएको छ । नेपाली बजारमा यो प्रिमियम सेडान क्रिस्टल ब्लु, क्यान्डी ह्वाइट, ब्रिलियन्ट सिल्भर र कार्बन स्टिल गरी चार रङमा उपलब्ध छ । यसको मूल्य ४९ लाख ४० हजारदेखि ७४ लाख ९० हजार रुपैयाँसम्म रहेको कम्पनीले बताएको छ ।

निसान लिफ

नेपालका लागि निसान गाडीको आधिकारिक विक्रेता पायोनियर मोटो कर्पले जेरो इमिसन सेकेन्ड जेनेरेसन निसान लिफ विद्युतीय गाडी सार्वजनिक गरेको छ । कम्पनीका अनुसार गाडीमा ४० किलोवाट आवरको लिथियम–आयन ब्याट्री रहेको छ । गाडीले ३११ किलोमिटरसम्म रेन्ज प्रदान गर्ने कम्पनीको दाबी रहेको छ । गाडीको अधिकतम गति १४० किलोमिटर प्रतिघन्टा रहेको कम्पनीले बताएको छ । कम्पनीका अनुसार गाडीले ७ दशमलव ९ सेकेन्डमा शून्यबाट १०० किलोमिटरको गति लिन सक्छ । कम्पनीका अनुसार निसान लिफसँगै आउने युनिभर्सल चार्जिङ केबलको साथ घरको वाल–आउटलेटमार्फत १५ देखि १८ घण्टामा फुल चार्ज गर्न सकिन्छ । गाडीमा ३ वर्ष वा १ लाख किलोमिटरको वारेन्टी रहेको छ । यस्तै यसको ब्याट्रीमा ८ वर्ष वा १ लाख ६० हजार किलोमिटरको वारेन्टी रहेको कम्पनीले बताएको छ । निसानले निसान लिफ विद्युतीय गाडीका साथै नाभारा प्रो फोर एक्स गाडीको विशेष लाइफ स्टाइल एडिसन र नयाँ निसान म्याग्नाइटको नयाँ एएमटी भेरियन्ट पनि सार्वजनिक गरेको छ ।

महिन्द्रा स्कोर्पियो क्लासिक

नेपालका लागि महिन्द्रा गाडीको आधिकारिक विक्रेता अग्नि इन्कर्पोरेटले नयाँ मोडलको स्कोर्पियो क्लासिक शोमा सार्वजनिक गरेको छ । कम्पनीका अनुसार गाडीको मूल्य ८० लाख ५० हजार रुपैयाँ रहेको छ । स्कोर्पियो क्लासिकमा २.२ लिटर फोर सिलिण्डर डिजेल इन्जिन रहेको छ । गाडीको इन्जिनले १३६ हर्स पावर उत्पन्न गर्छ । यस्तै, गाडीले ३०० एनएम टर्क उत्पादन गर्ने कम्पनीको दाबी रहेको छ । गाडीमा ६ स्पीड म्यानुअल गियरबक्सका साथै क्रुज कन्ट्रोल, नयाँ स्टेरिङ ह्वील, पावर विन्डो, सेकेन्ड रोमा एसी भेन्ट्स, अटोमेटिक क्लाइमेट कन्ट्रोल, ड्यूल एयरब्याग लगायत विशेषता छन् । गाडीमा टु ह्वील र फोर ह्वील ड्राइभ अप्सन पनि उपलब्ध छ ।

होन्डा एलिभेट

नेपालका लागि होन्डा गाडीको आधिकारिक विक्रेता स्याकार ट्रेडिङले सार्वजनिक गरेको ५ सिटर एसयूभी होन्डा एलिभेट पनि प्रदर्शनमा राखिएको छ । नेपालमा विभिन्न आठ भेरियन्टमा उपलब्ध रहेको गाडीको मूल्य ५६ लाख ३५ हजारदेखि ७९ लाख ४४ हजार रुपैयाँसम्म रहेको कम्पनीले बताएको छ । गाडीको २२० मिलिमिटर ग्राउन्ड क्लियरेन्स रहेको छ । गाडीको इन्जिनले ११९ हर्स पावर शक्ति प्रदान गर्ने कम्पनीको दाबी रहेको छ । गाडीमा जडान गरिएको अत्याधुनिक होन्डा सेन्सिङ प्रणालीले ड्राइभरलाई सहायता गर्दै अत्यधिक सुरक्षा प्रदान गर्ने कम्पनीले बताएको छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस