नाडा अटो शो २०२३ विशेष: नाडा अटो शोले उपभोक्तादेखि अर्थतन्त्रसम्म फाइदा पुग्छ

अभियान संवाददाता

नाडा अटोमोबाइल्स एशोसिएशन अफ नेपाल (नाडा)द्वारा आयोजित ‘नाडा अटो शो २०२३’ शुरू भएको छ । काठमाडौंको भृकुटीमण्डपमा मंगलवारदेखि शुरू भएको प्रदर्शनीमा प्रख्यात अन्तरराष्ट्रिय ब्राण्डका सवारीसाधन, लुब्रिकेन्ट, टायर, पार्टपुर्जा प्रदर्शनीमा राखिएका छन् । मेलामा राष्ट्रिय ब्राण्डका अटो सामग्री उत्पादक, वस्तु तथा सेवा प्रदायकको उल्लेख्य सहभागिता रहेको छ । नाडाका अध्यक्ष ध्रुव थापा यो मेलाले ग्राहकदेखि डिलरसम्मलाई अवसर नै अवसर सृजना गरेको बताउँछन् । प्रस्तुत छ, नाडा अटो शोका विविध विषयमा आधारित रहेर अध्यक्ष थापासँग आर्थिक अभियानका अनन्त्य सुन्दरले गरेको कुराकानीको सार :

‘नाडा अटो शो २०२३’ का मुख्य आकर्षण के कस्ता छन् ?

नाडा अटो शो २०२३ मा राखिएका सबैजसो गाडी नयाँ छन् । मेलामा राखिएका कतिपय गाडी बाहिर अन्य मुलुकमा भर्खरै सार्वजनिक भएका पनि छन् । नाडा अटो शो अन्तरराष्ट्रिय स्तरको बनेको छ । यसमा ग्राहकलाई विभिन्न कम्पनीले गाडी खरीदमा ठूलो अफर तथा छूट दिएका छन् । चार वर्षपछि भएको यो मेलामा नयाँ ब्रान्डका गाडी पनि राखिएका छन् । साथै बैंक, बीमा कम्पनीले गाडी खरीद गर्दा विभिन्न किसिमका छूटका स्किम पनि ल्याएका छन् ।

मेलामा कतिओटा कम्पनी र कति मूल्यका गाडी राखिएका छन् ?

मेलामा एकदमै सस्तादेखि महँगा विलासी गाडी प्रदर्शनीमा राखिएका छन् । कारहरू न्यूनतम १३ लाखदेखि कराडौं रुपैयाँसम्मका राखिएका छन् । मेलामा सबै गरी १२० ओटा स्टल छन् । त्यसैगरी शोमा १६ ओटा ब्राण्डका चारपांग्रे, २२ ओटा ब्राण्डका दुईपांग्रे, सातओटा ब्राण्डका लाइट कमर्शियल भेहिकल, ९ ओटा वित्तीय संस्था तथा ३० ओटा लुब्रिकेन्ट, टायर, ब्याट्री, पार्टपुर्जा एवं ग्यारेज उपकरण कम्पनीको पनि सहभागिता छ ।

मेलाका प्रमुख विशेषता के हुन् ?

हामीले चाडपर्वलाई लक्षित गरेर प्रदर्शनी गर्दै आएका थियौं । तर विविध कारणले केही वर्ष गर्न सकेका थिएनौं । शोको मुख्य विशेषता नै ग्राहकलाई एउटै छानामुनि विभिन्न ब्रान्डका विभिन्न गाडी हेरेर, छानेर आफूले किन्न सक्ने ठाउँ जुटाइदिने हो । साथै चाडपर्वको अवसरमा विभिन्न कम्पनीले अफर पनि दिएका हुन्छन् । गाडी उत्पादक कम्पनीसँग हामीले नै अफर मागेर प्रस्तुत गरेका छौं, जुन अफर यो मेलापछि हुँदैन । अहिले उत्पादक कम्पनीले प्रत्यक्ष रूपमा अफर दिन्छन् । यसबाट ग्राहक पनि धेरै लाभान्वित हुन्छन् । नाडा अटो शो ग्राहकलाई धेरैभन्दा धेरै कम्पनीका सवारीसाधन अवलोकन तथा खरीदका लागि अवसर दिने उपयुक्त प्लेटफर्म हो । मेलामा ग्राहकले एकै ठाउँमा थुप्रै गाडीको विशेषता तुलना गरेर आफूलाई उपयुक्त हुने गाडी किन्न सक्छन् ।

मन्दीको बेला अर्थतन्त्र चलायमान बनाउन यस्तो मेलाको कस्तो भूमिका हुन्छ ?

मन्दीको बेला अटो शो नगर्ने कि भन्ने कुरा नाडामा उठेको पनि थियो । तर यस्तो ठूला शोहरू नगर्दा अर्थतन्त्र झन् शिथिल हुन्छ । अटो व्यवसायले समग्र देशको अर्थतन्त्रलाई नै चलायमान बनाउने भएकाले मन्दीको अवस्था भए तापनि हामीले चुनौती लिएरै शो आयोजना गरेका हौं । त्यसैले यो मेलाले बजारमा सकारात्मक सन्देश दिन्छ । साथै अर्थतन्त्र चलायमान बनाउन सहयोग पुग्ने अपेक्षा गरेका छौं । पहिलो दिन मेलामा सहभागी भएका अवलोकनकर्ताको संख्याले इतिहास रचेको छ । पहिलो दिन अवलोकनकर्ताको सहभागिताबाट हामीले अटोप्रति नेपालीको आकर्षण उच्च रहेको पाएका छौं । पहिलो दिनमै अत्यधिक सवारीसाधन बुकिङ भइसकेको जानकारी आएको छ । त्यसैले यस मेलाले अहिलेको मन्दीमा अर्थतन्त्रलाई चलायमान बनाउन अवश्य पनि मद्दत गर्छ ।

डिलरका लागि मेलाले कस्तो टेवा पुग्ला ?

यो शो डिलर, आयातकर्ताका साथै सिंगो देशकै लागि नै हो । अटो शोका लागि भनेर अहिले हजारौं गाडी भन्सारमा आएका छन् । त्यसैले मेलाले डिलर, उपभोक्ताका साथै सबैलाई अवसर सृजना गरेको छ । साथै, राजस्व संकलनमा अटो क्षेत्रको प्रमुख भूमिका रहेकाले यो शो डिलर मात्र नभएर अटो क्षेत्रसँग सम्बन्धित सबैका लागि हो । समग्रमा नाडा अटो शोले सकारात्मक परिवर्तन ल्याउनेमा हामी आयोजक विश्वस्त छौं ।

अटो क्षेत्रलाई सरकारले कसरी प्रोत्साहन गर्नुपर्छ ?

राष्ट्र बैंकले विदेशी विनिमय सञ्चितिमा ह्रास आयो, डलर सिद्धिँदै गयो भनेर गाडीको आयातमा प्रतिबन्ध लगाएको थियो । डलर सञ्चिति अहिलेसम्मकै उच्च भएको समयमा पनि यसमा चाप परेको देखाएर लगाइएको प्रतिबन्ध अहिले पनि कायम छ । अटो मोबाइल क्षेत्र देशको आर्थिक विकासका लागि आधारस्तम्भ हो । तर यो क्षेत्रलाई नियामकबाट बेला बेलामा अप्ठ्यारोमा पार्ने काम भइरहेको छ । यसलाई तत्काल सुधार्नुपर्ने अवस्था छ । गाडी आयातमा पहिले विदेशी विनिमय सञ्चिति कम हुँदा लगाइएका प्रतिबन्ध हटाउन आवश्यक छ । 

विगतका भन्दा यसपटकको अटो शोमा के परक छ ?

विगतमा हुने अटो शोहरूमा भन्दा अहिले पक्कै धेरै फरक छ । अहिले हामीले शोलाई अन्तरराष्ट्रिय स्तरको बनाउने प्रयास गरिरहेका छौं । चार वर्षअघि सबै ब्रान्डका सबै मोडेलका सवारीसाधन शोमा हुन्थे । तर यसपटक हामीले सम्पूर्ण नयाँ ब्रान्डका नयाँ मोडलका गाडी भित्त्याएका छौं । मेलामा विश्वमा चलेका नयाँ मोडेलका गाडी राखिएका छन् । दर्जनभन्दा बढी सवारीसाधन एकै पटकजसो सार्वजनिक भएका छन् । साथै मेलामा भएका सबैजसो वस्तुमा आकर्षक अफर पनि छन् ।

नाडा अटो शोका मुख्य उद्देश्य के के छन् ?

हामीले शो राख्नुको मुख्य उद्देश्य नै ग्राहकले यसबाट फाइदा लिऊन् भन्ने हो । साथै व्यवसायीले पनि आफ्नो व्यापार बढाउन सकून् । हामीले यो शोमा रू. २० अर्बको व्यापार हुने अनुमान गरेका छौं । पहिलो दिनको अवलोकनकर्ताको भीड देखेर हाम्रो उक्त लक्ष्य सजिलै पूरा गर्ने अपेक्षा छ । २० अर्बको कारोबार भयो भने सरकारलाई ४० अर्बको राजस्व आउँछ ।

यसपटकको मेलामा विद्युतीय सवारीसाधनमा उपभोक्ताको बढी आकर्षण देखिएको हो ?

हो, मेलामा विद्युतीय सवारीसाधनप्रति अवलोकनकर्ताको बढी आकर्षण देखिएको छ । हामीले यसपटक ६० प्रतिशत विद्युतीय सवारीसाधन राखेका छौं । व्यवसायीले पनि बजारमा जुन गाडीको धेरै माग हुन्छ, त्यही राख्ने गर्छन् । अहिले नेपालमा मात्र नभएर विश्वभर नै विद्युतीय सवारीसाधनको माग धेरै छ । स्वाभाविक रूपमा नेपालमा पनि यसको ठूलो प्रभाव परेको छ । विद्युतीय सवारीसाधन सञ्चालनका लागि चार्जिङ स्टेशन लगायत पूर्वाधार बन्न थालेका छन् । यसले पनि उपभोक्तालाई विद्युतीय सवारीसाधन खरीदमा उत्साह बढाएको छ ।

प्रतिक्रिया [0]