१० वर्षअघिको आर्थिक अभियानबाट : निर्माण कार्य छिटो गर्न निर्देशन

प्रोजेक्ट स्टेयरिङ कमिटीले भारतीय लगानीमा निर्माण भइरहेका विभिन्न आयोजना छिटो सम्पन्न गर्न सम्बद्ध निर्माण कम्पनीलाई निर्देशन दिएको छ । चार दिनसम्म आयोजनाहरूको स्थलगत अनुगमन गरेर निर्माण कम्पनीलाई सो निर्देशन दिइएको भौतिक तथा निर्माण मन्त्रालयका वैदेशिक लगानी महाशाखा प्रमुख रमेशराज विष्टले जानकारी दिए । नेपाल र भारतीय अधिकारीहरू सम्मिलित कमिटीसम्बद्ध टोलीले जनकपुर जयनगर रेलमार्ग वीरगन्जस्थित हुलाकी राजमार्ग र एकीकृत भन्सारचौकीको स्थलगत अनुगमन गरेको थियो । टोलीको नेतृत्व नेपालको तर्फबाट मन्त्रालयका सहसचिव विष्ट र भारतको तर्फबाट विदेश मन्त्रालयका सहसचिव अखिलेश मिश्रले गरेका थिए । २९ किलोमिटर लामो जनकपुर जयनगर रेलमार्ग साँघुरो हुनुका साथै सो रेलमार्गको विभिन्न स्थानमा रहेको स्टेसनमा नयाँ पूर्वाधारहरू निर्माण गर्नुपर्ने स्थिति रहेको विष्टले बताए । उनका अनुसार सो खण्डमा ट्र्याकलाई व्यवस्थित गर्दै ठूलो क्षमताको रेल सञ्चालनका लागि सहयोग गर्न पनि भारत तयार भएको छ ।

वर्ष ६, अंक २१५, शुक्रवार, ८ वैशाख, २०६९

प्रतिक्रिया [0]